ኢትዮጵያ ለደቡብ ሱዳን ህዝብ ሠላም ከማስከበሩ ባሻገር በመሰረተ ልማቱም ዘርፈ ብዙ ድጋፎች በማበርከት ላይ እንደምትገኝ በደቡብ ሱዳን ባለ ሙሉ ሥልጣንና ልዩ መልዕክተኛ አምባሳደር ነቢል ማሃዲ ገልፀዋል።
በ18ኛ ሞተራይዝድ ሻለቃ የሜዳሊያ ሥነ-ሥርዓት ላይ ንግግር ያደረጉት አምባሳደር ነቢል ማሃዲ፤ የኢትዮጰያ ሰላም አስከባሪ ለደቡብ ሱዳን ህዝብ ሰላም መስፈን ከፍተኛ አስተዋፅኦ ማበርከቱን ተናግረዋል።
ሁለቱ ሃገራት ጠንካራ ትስስር እንዳላቸው ገልጸው፤የኢትዮጵያ ሰላም አስከባሪ ግዳጁን በላቀ ብቃት የሚወጣ መሆኑን በተባበሩት መንግስታት በደቡብ ሱዳን የሰላም ማስከበር አስመስክሯል ብለዋል።
ኢትዮጵያ በደቡብ ሱዳን የሰላም ማስከበር ተልዕኮ ባበረከተችው አስተዋፅኦ፣ለዓለም ሃገራትም እያበረከተች የሚገኘው ሁለንተናዊ ድጋፍ ህዝባዊነቱን የሚያረጋግጥ መሆኑን ተናግረዋል።
አምባሳደር ነቢል በደቡብ ሱዳን ለሚገኘው የሰላም አስከባሪ ስኬታማነት ላበረከቱት ድጋፍ የ18ኛ ሞተራይዝድ ሻለቃ ያዘጋጀው ስጦታ እንደተበረከተላቸው ከኢፌዴሪ መከላከያ ሠራዊት ማሕበራዊ ትስስር ገጽ ተገኘው መረጃ ያመላክታል።