በዓለም ላይ ከሚገኘው ከ35 ሺህ በላይ የዓሣ ዝርያዎች ውስጥ 200 የዓሳ ዝርያዎች በኢትዮጵያ ይገኛሉ::
የብሄራዊ የዓሣና የውኃ ውስጥ ህይወት ምርምር ማዕከል ዋና ዳይሬክተር ዶ/ር ጋሻው ተስፋዬ ኢትዮጵያ እምቅ የዓሳ ሀብት መገኛ ነች ብለዋል፡፡
ሃገሪቱ በሀይቆችና ወንዞች በዓመት እስከ 73 ሺህ ቶን፤ በዓሳ ግብርና ደግሞ 2 ሺህ ቶን ብቻ ዓሳ እያመረተች መሆኑን ደግሞ የግብርና ሚኒስቴር መረጃ ያሳያል::
የብሄራዊ የዓሳና የውሃ ውስጥ ህይወት ምርምር ማዕከል የዓሳ ሀብትን ለመጠቀም የሚያግዙ ዘዴዎችን በምርምር የማስተዋወቅ ስራ ይሰራል::
ማዕከሉ ከግብርና ሚኒስቴር ጋር በመተባበር ሁለት የተለያዩ የቆሮሶ የዓሳ ዝርያዎችን በማዳቀል የሚፈለገውን ወንድ የቆሮሶ ዓሣ ጫጩት ብቻ ለማስፈልፈል የሚያሥችል የምርምር ሥራ መስራቱን ዋና ዳይሬክተሩ ገልጸዋል::
ይህም 75 በመቶ ወንድ የዓሳ ጫጩት ማራባት የሚያስችል የምርምር ውጤት እንዲገኝ ምክንያት መሆኑን ጠቁመዋል::
በአጭር ጊዜ ከፍተኛ ምርት ለማግኘት የሚያስችል የመኖ ቴክኖሎጂ ምርምር ሙከራም እየተሰራ እንደሚገኝ ገልጸዋል::
በማዕከሉ የዓሳ ተማራማሪ አቶ አለማየሁ ውቤ፤ እንደ ሙቀቱ መጠን ከ4-6 ቀን በቤት ውስጥ የዓሣ ማስፈልፈያ ተክኖሎጂ በመጠቀም ከቆሮሶ ዓሳ እንቁላል ተወስዶ የማስፈልፈል ስራ ይሰራል ብለዋል::
ማዕከሉ ከኔዘርላንድ ባስመጠው ዘመናዊ የዓሳ ማባዣ (ማስፈልፈያ) መሳሪያ ከ1 እስከ 2 ወር ውስጥ "ዱባ" እና "ቆሮሶ" ዝርያዎችን ጫጩት በማባዛት ፍላጎት ላላቸው እያሰራጨ እንደሚገኝ ተናግረዋል፡፡
ኢትዮጵያ ከተፈጥሮ እና ሰው ሰራሽ የውሃ አካላት በዓመት 130 ሺህ ቶን ዓሣ ታመርታለች::
የግብርና ዘዴን በመጠቀም ደግሞ 400 ሺህ ቶን የምታመርት ሲሆን በድምሩ ከ530 ሺህ ቶን ዓሣ የማምረት እምቅ ኃብት እንዳላት የብሄራዊ የዓሣና የውኃ ውስጥ ህይወት ምርምር ማዕከል መረጃ ያመላክታል::
በላሉ ኢታላ