ብልፅግና ፓርቲ ለህዝብ ቃል በገባው መሰረት በዘላቂ ሰላም ግንባታና አካታች ልማት አበረታች ስኬቶችን ማስመዝገቡን የፓርቲው ምክትል ፕሬዝዳንትና ምክትል ጠቅላይ ሚኒስትር ተመስገን ጥሩነህ ገለጹ።
የብልፅግና ፓርቲ ሥራ አስፈጻሚ ኮሚቴ በመደበኛ ስብሰባው ከመከረባቸው አጀንዳዎች መካከል ሰላምና ልማት ዋነኞቹ መሆናቸውንም ተናግረዋል።
በብልፅግና ፓርቲ የሚመራው መንግሥት ኢትዮጵያን ከግጭት አዙሪት ለማላቀቅ ጠንካራና ቅቡልነት ያለው ሀገረ መንግሥትና አወንታዊ ሰላም ግንባታ ላይ ብዙ ርቀት መጓዙን አንስተዋል።
ለውጡ ያልተዋጠላቸው አካላት የፈጠሯቸውን ግጭቶች በድርድርና በውይይት ማርገቡንም ገልጸዋል።
ለአወንታዊ ሰላም ግንባታ መሳካትም ችግሮችን በሀገራዊ ምክክር ለመፍታት፣ የሽግግር ፍትህና የተሃድሶ ተግባራትን ለማከናወን ተግባራዊ ቁርጠኝነቱን በማሳየት ላይ ነው ብለዋል።
መንግሥት ታጥቀው ለሚንቀሳቀሱ አካላት ባደረገው ጥሪ መሰረት በኦሮሚያና በአማራ ክልሎች በርካታ የታጠቁ ቡድኖች ወደ ሰላም በመምጣት የሀገር ጸጥታና ልማትን ለማረጋገጥ ዋነኛ ተዋናይ በመሆን ላይ እንደሚገኙ አብራርተዋል።
ብልፅግና ፓርቲ የሚመራው መንግሥት ባለፉት ዓመታት ከጎረቤት ሀገራት ጋር ያለውን ሰላማዊ ግንኙነት በማጠናከር ከአንድም ሀገር ጋር ግጭት ውስጥ አለመግባቱንም በስኬት አንስተዋል።
ምክትል ጠቅላይ ሚኒስትሩ አክለውም፤ የሀገርን ሰላምና ደህንነት በዘላቂነት የሚያስጠብቁ ጠንካራ የፀጥታ ተቋማት መገንባታቸውን ገልጸዋል።
ፓርቲው በአንደኛ ጉባኤው ህዝብን ማዕከል ያደረጉ የብዝኃ ዘርፍ የኢኮኖሚ ልማቶችን እንደሚተገብር ቃል መግባቱን አውስተው፤ በዚሁ መሰረት አመርቂ ውጤቶች መመዝገባቸውን ገልጸዋል።
ለአብነትም በግብርናው ዘርፍ ምርታማነትን በማሳደግ ከውጭ የሚገባ ስንዴን ሙሉ ለሙሉ ለማስቀረት የገባውን ቃል መፈጸሙን ጠቅሰው፤ አሁን ላይ ወደ ውጭ መላክ ተጀምሯል ማለታቸውን የብልፅግና ፓርቲ መረጃ ያመለክታል።
በቱሪዝም ዘርፉም በገበታ ለሀገር ፕሮጀክቶች የኢትዮጵያን ገፅታ የቀየሩ አዳዲስ የቱሪዝም መዳረሻዎች በጥራትና በፍጥነት መተግበራቸውን አንስተዋል።
በኢትዮጵያ ታምርት ንቅናቄ ቁመው የነበሩ ፋብሪካዎች ስራ መጀመራቸው፣ ከውጭ የሚገቡ ምርቶችን መተካት፣ እና የማዕድን ዘርፉ ላይ መሰረታዊ ለውጦች መምጣታቸውንም ጠቅሰዋል።
እንደ ምክትል ጠቅላይ ሚኒስትሩ ገለጻ፤ ፓርቲው የህዝብ አገልግሎት አሰጣጥን ለማሻሻል በገባው ቃል መሰረት የመንግሥት አገልግሎቶችን ወደ ዲጅታል በማስገባት ሲቪል ሰርቪሱን ሪፎርም ማድረግ ጀምሯል።
ፓርቲው እንደ ሀገር ያልተሻገርናቸውን ችግሮች በመፍታት አካታች የኢኮኖሚ እድገት፣ ዘላቂ ልማትና ሰላም ላይ ያስመዘገባቸውን ውጤቶች አጠናክሮ ይቀጥላል ሲሉም ገልጸዋል።
ኢትዮጵያን እምቅ ጸጋዋን በመጠቀም ወደ ከፍታዋ ለመውሰድ ልዩነቶችን በውይይት መፍታት እና በተባበረ ክንድ ልማት ላይ ትኩረት ማድረግ የብልፅግና ቀዳሚ አጀንዳ መሆኑንም አረጋግጠዋል።