ኦቪድ ግሩፕ ከ47 ቢሊዮን ብር በላይ ኢንቨስት በማድረግ በተለያዩ ኢንዱስትሪ ፓርኮች ለሚተገብራቸው ፕሮጀክቶች የሚሆኑ የቅድመ ዝግጅት ስራዎች ተጀምረዋል።
የኢንዱስትሪ ፓርኮች ልማት ኮርፖሬሽን ዋና ስራ አስፈፃሚ አክሊሉ ታደሰ የኦቪድ ግሩፕ ዋና ስራ አስፈፃሚ አቶ ዮናስ ታደሰን ስለ ቅድመ ዝግጅት ስራዎቹ አነጋግረዋል።
በውይይቱ ወቅትም ኦቪድ ግሩፕ ሰርቶ ያጠናቀቃቸው፣ እየሰራቸው ያሉና ወደፊት ለመስራት በእቅድ የያዛቸው በርካታ ፕሮጀክቶችን አስመልክቶ ያዘጋጃቸውን ነጥቦች ለዋና ስራ አስፈፃሚው አቅርቧል።
በተለይም በኢንዱስትሪ ፓርኮች ውስጥ ለሚተገብራቸው ኢንቨስትመንቶች ያዘጋጀውን እቅድ አቅርቦ ውይይት ተደርጎባቸዋል።
የኢንዱስትሪ ፓርኮች ልማት ኮርፖሬሽን ዋና ስራ አስፈፃሚ አክሊሉ ታደሰ ኦቪድ ግሩፕ ግዙፍ ሀገራዊ ፋይዳ ያላቸው ፕሮጀክቶችን በአጭር ግዜ ሰርቶ በማጠናቀቁ አመስግነዋል።
ፕሮጀክቱ በኢንዱስትሪ ፓርኮች ውስጥ ተግባራዊ ሆኖ ስራ እስኪጀምር ድረስ ያልተቋረጠ ድጋፍና ክትትል እንደሚደረግም አረጋግጠዋል።
የኦቪድ ግሩፕ ዋና ስራ አስፈፃሚ አቶ ዮናስ ታደሰ ፕሮጀክቱ ከስምንት ወራት እስከ አንድ አመት ባለው ግዜ ውስጥ ይጠናቀቃል ብለዋል።
ፕሮጀክቱ ተጠናቆ ወደ ተግባር ሲገባ ከ13 ሺ በላይ ለሚሆኑ ዜጎች የስራ እድል እንደሚፈጥርም መግለፃቸውን ከኢንዱስትሪ ፓርኮች ልማት ኮርፖሬሽን ያገኘነው መረጃ ያመለክታል፡፡