በደቡብ ምስራቅ ስፔን በጣለው ከባድ ዝናብ ምክንያት በርካታ ሰዎች ህይወታቸው ማለፉ እና ከፍተኛ ንብረት መውደሙ ተገልጿል፡፡
የሀገሪቱ ምስራቃዊ ግዛት በሆነችው ቫሌንሺያ የጣለው ከባድ ዝናብ ያስከተለው ጎርፍ በትንሹ የ 95 ሰዎችን ህይወት መቅጠፉ ተጠቅሷል፡፡
የአደጋ ጊዜ ሰራተኞች ተጎጂዎችን የማፈላለግ እና ነፍስ የማዳን ስራ እያከናወኑ ሲሆን፤ ከ 1 ሺህ በላይ ወታደሮች ጉዳት ወደደረሰባቸው አከባቢዎች ለዚሁ ተግባር ተሰማርተዋል ተብሏል፡፡
የስፔን ማዕከላዊ መንግስትም የነፍስ አድን ስራውን ለማገዝ እንዲቻል የአስቸኳይ ጊዜ ኮሚቴ ማቋቋሙ ተጠቁሟል፡፡
የስፔን ጠቅላይ ሚኒስትር ፔድሮ ሳንቼዝ አደጋው ባደረሰው ጉዳት ከባድ ሃዘን እንደተሰማቸው ገልጸው፤ የጎርፍ አደጋው በተከሰተበት አካባቢ ያሉ ሰዎች ጥንቅቃ እንዲያደርጉና የነፍስ አድን ስራውን ተጠናክሮ መቀጠሉን ተናግረዋል፡፡
ሃገሪቱ በጎርፍ አደጋ ሕይወታቸውን ላጡ ዜጎች መታሰቢያ የሶስት ቀናት ብሄራዊ ሃዘን ማወጇን የዘገበው አልጀዚራ ነው፡፡