Back

የወጣቶች ተዘዋዋሪ ፈንድ ወደ ትግበራ ተሸጋግሯል፡- የወጣቶችና ስፖርት ሚኒስቴር

መጋቢት 10፣ 2009

አስር ቢሊዮን ብር ተዘዋዋሪ ፈንድ የተመደበለት የወጣቶች የልማትና የእድገት ስትራቴጂ ቅድመ ዝግጅት ተጠናቆ  ወደ ትግበራ ምዕራፍ መሸጋገሩን የወጣቶችና ስፖርት ሚኒስትሩ አቶ ርስቱ ይርዳ ገለፁ።

ሶስት ሚሊዮን ስራ አጥ ወጣቶች ወደ ስራ ለመግባት ተመዝግበዋል።

ሚኒስትሩ ለኢዜአ እንደገለፁት በስትራተጂው የዝግጅት ምዕራፍ  በህብረተሰቡና በወጣቱ ዘንድ በቂ ግንዛቤ የመፍጠር፣ የስራ ፈላጊ ወጣቶች ብዛትና በምን ስራ መሰማራት እንደሚፈልጉ የመለየት ስራ ተከናውኗል፡፡

ለስትራቴጂው ማስፈፀሚያ የተመደበውን በጀት ደልድሎ ወደ ታች የማውረድና የመስሪያና የመሸጫ ፍላጎት ለይቶ የማወቅ ስራዎችም እንዲሁ።

በሒደቱ በሁሉም ክልሎች 3 ሚሊዮን ስራ ፈላጊ ወጣቶች ተመዝግበው በማደራጀትና ስልጠና በመስጠት ወደ ስራ የማስገባት እንቅስቃሴ መጀመሩን ሚኒስትሩ ተናግረዋል ።

የተመደበው ገንዘብ  ለታሰበለት ዓላማ እንዲውል  የህግ ማዕቀፍ ተዘጋጅቶለት በኢትዮጵያ ንግድ ባንክ አስተባባሪነት በየክልሉ ለተመረጡ 11 የፋይናንስ ተቋማት እንዲደርስ ተደርጓል።

ሚኒስትሩ እንዳመለከቱት የበጀት ድልድሉ ክልሎች ባላቸው ስራ ፈላጊ ወጣት ቁጥር ተደልድሎ እስከ ታች ድረስ ወርዷል፤ ስትራቴጂው የወጣቶችን ኢኮኖሚያዊ ተጠቃሚነት ለማረጋገጥ የሚያስፈልጉ ቅድመ ሁኔታዎችን በማጠናቀቅ ወደ ትግበራ ተሸጋግሯል ።

በአዲሱ የወጣቶች የልማትና የእድገት ስትራቴጂ ቅድመ ዝግጅት ከማድረግ ጎን ለጎን በነባሩ የወጣቶች የልማት ፓኬጅ በዘንድሮው የመጀመሪያው መንፈቀ ዓመት ለ600 ሺህ ወጣቶች የስራ እድል እንደተፈጠረም ጠቁመዋል።

በሚኒስቴሩ የወጣቶች ማካተትና ተሳትፎ ዳይሬክተር አቶ ማቲያስ አሰፋ በበኩላቸው  መንግስት በመደበው ተዘዋዋሪ ፈንድ ዘንድሮ በገጠር አንድ ነጥብ ሰባት ሚሊዮን በከተማ ደግሞ አንድ ነጥብ አምስት ሚሊዮን ወጣቶችን ወደ ስራ ለማስገባት መታቀዱን ተናግረዋል፡፡

ከታቀደው ውስጥ የተመዘገቡት ወጣቶች  3 ሚሊዮን ናቸው ።

እስካሁን በደረሰው መረጃ መሰረት ትግራይ ወደ ትግበራ መግባቱንና አዲስ አበባ ከተማ መስተዳድር ስልጠና በመስጠት ላይ መሆኑን ዳይሬክተሩ ጠቁመው " ሁሉም ክልሎች በአጭር ጊዜ ውስጥ ወደ ተግባር ይገባሉ "ብለዋል ።

ተዘዋዋሪ ፈንዱ  ወጣቶችን ማዕከል አድርጎ ሴቶችን፣ አካል ጉዳተኞችንና ለሌላም ችግር  የተጋለጡ ወጣቶችን ለማብቃት ልዩ ትኩረት ይሰጣል ተብሏል።

የወጣቶችና ስፖርት ሚኒስቴር ለፌደራልና ለክልል መገናኛ ብዙሃንና የህዝብ ግንኙነት ባለሙያዎች  በወጣቶች ዘገባ ላይ ለሁለት ቀናት በአዳማ ከተማ ያዘጋጀው ስልጠና ተጠናቋል።

ምንጭ፡- ኢዜአ


ከኢትዮጵያ ሴት የፓርላማ ኮከስ አባላት ጋር መስራት እንደሚፈልጉ የሱዳን ሴት የፓርላማ አባላት ተናገሩ

የአዲስ አበባ ዩኒቨርስቲ የጤና ሳይንስ ኮሌጅ በህክምና ዘርፍ ያሰለጠናቸው 245 ተማሪዎችን አስመረቀ

በዩኒቨርስቲዎች ላይ የተፈጠረው የመማር ማስተማር ሂደት መስተጓጎል አሳስቦኛል:- የኢትዮጵያ መምህራን ማሕበር

የቀይ ሽብር ተከሳሹ የዕድሜ ልክ እስራት ተፈረደበት

በርካታ የግል ጤና ተቋማት በግለሰብ ህንፃ ላይ ተከራይተው አገልግሎት የሚሰጡ ናቸው

የኢትዮጵያ የውሃ ሃብት አያያዝ ዘመናዊና በመረጃ የተደገፈ መሆን እንዳለበት ተጠቆመ

የመንገድ ትራፊክ አደጋዎችን ለመቀነስ የተጀመረው ንቅናቄ ውጤታማ መሆኑ ተገለፀ

ኢትዮጵያ በጥሩ የኢኮኖሚ እድገት ላይ እንደምትገኝ የአይ ኤም ኤፍ ዋና ዳይሬክተር ገለጹ

ኢትዮጵያ የውሃ ሃብቷን ለማልማትና ለመንከባከብ የሚያስችል ረቂቅ ደንብ ተዘጋጀ