ኢትዮጵያ በ2017 ከአፍሪካ አገራት ፈጣን የኢኮኖሚ እድገት ታስመዘግባለች:- የአለም ባንከ

ግንቦት 29፣2009

ኢትዮጵያ  በተያዘው በአውሮፓውያኑ 2017 ከአፍሪካ አገራት ፈጣን የኢኮኖሚ እድገት እንደምታስመዘግብ የአለም ባንክ ገለጸ።

"ግሎባል ኢኮኖሚክ ፕሮስፔክት" በዚህ ወር ባቀረበው ሪፖርት እንዳመለከተው ኢትዮጵያ በተያዘው የአውሮፓውያኑ አቆጣጠር በ2017 ዓ.ም 8.3 ከመቶ የኢኮኖሚ እድገት ታስመዘግባለች።

ታንዛኒያ 7.2 ከመቶ አይቬሪኮስት 6.8 ከመቶ ሴኔጋል ደግሞ 6.7 ከመቶ እድገት በማስመዝገብ ኢትዮጵያን ይከተላሉ ብሏል።

የአለም ባንክ እንደገለፀው በተፈጥሮ ሃብት ያልተመሰረተ ኢኮኖሚ ያላቸው አገራት ኢኮኖሚው ጥንካሬውን ይዞ የመቆየት እድል አለው᎓᎓ በመሰረተ ልማት ኢንቨስትመንት፣ በጠንካራ የአገልግሎት ዘርፍ እና በእርሻ ምርት መስፋፋት ስለሚታገዝ ነው ይላል ሪፖርቱ᎓᎓

የአገሪቱ የህዝብ ብዛትም ሌላው የኢትዮጵያን ኢኮኖሚ ለማደግ የሚረዳ  ነው ተብሏል።

አለም አቀፉ የገንዘብ ተቋም አይአኤምአኤፍ ባለፈው ሚያዝያ ወር ባወጣው ሪፖርት ኢትዮጵያ ባለፉት አመታት በተከታታይ ባስመዘገበችው አመታዊ ጥቅል ምርት ኬንያን በመብለጥ የምስራቅ አፍሪካ ቀዳሚ የኢኮኖሚ ባለቤት መሆኗ ማመልከቱ ይታወሳል።

የኢትዮጵያ ኢኮኖሚ  አመታዊ ጥቅል ምርት  በአውሮፓውያኑ 2016 ከነበረው 72 ቢሊዮን ዶላር   በ2017  ወደ 78  ቢሊዮን ዶላር እንደሚያድግ  አለም አቀፉ የገንዘብ ተቋም ትንበያ አመልክቷል።

ምንጭ:-አፍሪካ ኒውስ