የጋምቤላ ክልል ሀሰተኛ የትምህርት ማስረጃ የተገኘባቸውን 9 የክልሉ ስራ አስፈፃሚዎችን ከኃላፊነት አገደ

የካቲት 01 ፣2009

የጋምቤላ ክልል የስነ  ምግባርና ፀረ  ሙስና ኮሚሽን ሀሰተኛ የትምህርት ማስረጃ የተገኘባቸው 9 የክልሉ ስራ አስፈፃሚዎችን ከኃላፊነት አባረረ።

የኮምሽኑ  ኃላፊ ኮሚሽነር ኡሞድ ኡጁሉ በተለይ ለኢቢሲ እንዳሉት የጋምቤላ ህዝብ ዴሞክራሲያዊ  ንቅናቄ ባካሄደው የጥልቅ ተሃድሶ መድረክ  በክልሉ ብቁ አመራሮችን ለመለየት እንዲቻል ባስቀመጠው አቅጣጫ መሰረት  የተወሰደ እርምጃ ነው።   

ኮሚሽኑ ይህን ተከትሎ ከትምህርት ሚኒስቴር ጋር በመተባበር ባካሄደው  የማጣራት ስራ ከ201 የክልሉ  ከፍተኛ ስራ አስፈፃሚዎች ዘጠኙ ሀሰተኛ የትምህርት ማስረጃ ይዘው ተገኝተዋል።

በመሆኑም ኮሚሽኑ  እነዚህ ሀሰተኛ የትምህርት ማስረጃ ይዘው የተገኙ ከፍተኛ የክልሉ አመራሮች  የትምህርትቢሮ  ኃላፊውን ጨምሮ  ከስራቸው እንዲባረሩ  መደርጉን ኮሚሽነሩ ተናግረዋል።

በዚህም መሰረት በሀሰተኛ የትምህርት ማስረጃ ከኃላፊነታቸው የተነሱት የክልሉ  የስራ ኃላፊዎች

1. ኚሙሉ ኦጋኒ   - የክልሉ ዋና ኦዲት  መስሪያ ቤቱ ምክትል ኦዲተር

2. ጋትዊች ዋር   -የክልሉ  የኮንስትራክስን ቢሮ  ኃላፊ

3. ፖል ጆክ     - የክልሉ መገናኛ ብዙኃን መረጃ ነፃነት ኤጀንሲ ዳይሬክተር

4. ሳይመን ጋትልዋክ - የክልሉ መስተዳደር የአስተዳደርና ማህበራዊ ጉዳዮች አማካሪ 

5. ቱት ጆክ        -የክልሉ የትምህርት ቢሮ ኃላፊ

6. ቾል ኮር        -የክልሉ መስተዳደር  ምክር ቤት  የመሰረተ ልማት አማካሪ

7. ሜሪ ኛንዌር ዶክ - በጤናና ጤና ነክ  ኤጀንሲ የሴቶች ዩኒት አስተባባሪ

8. ኙዌች ጋችሉል    -የጋምቤላ ከተማ አስተዳደር ገቢዎች ፅ/ቤት የሴቶች ዩኒት ኃላፊ

9. ኛዬር ሉልዴንግ    - በክልሉ  የትራንስፖርትና መንገድ ልማት ቢሮ  የሴቶች ዩኒት አስተባባሪ ናቸው።

በዚህ የወንጀል  ድርጊት የተሳተፉት   ግለሰቦች ወደፊት በህግ እንደሚጠየቁ የጋምቤላ ክልል የስነ  ምግባርና ፀረ  ሙስና ኮሚሽነሩ አቶ ኡሞድ ኡጁሉ ተናግረዋል።

በቀጣይም ከክልል እስከ ወረዳ ድረስ የስራ አስፈፃሚዎች እና ባለሙያዎች ሀሰተኛ የትምህርት ማስረጃ የማጣራት ስራው ተጠናክሮ የቀጠለ  ሲሆን እስከ አሁን የ328 ግለሰቦች የትምህርት ማስረጃ ማጣሪያ እየተደረገ መሆኑን ኮሚሽነሩ ገልፀዋል።